呢张相系喺1959年，我大家姐20岁（最后排）准备结婚嗰阵去艳芳影嘎。以前系以肥为审美标准，所以我大姐系最靓嘅，而我（一排右一）就系最难睇嘅，外号为“瘦骨仙”。二姐冇出现喺呢张相度，甚至冇出现过喺我面前。因为喺日本仔侵略中国嗰阵，生活困难，连饭都冇得食，爸爸重畀人卖猪仔去咗海南岛修第一条铁路，妈妈冇办法，就将啱啱出世嘅二姐送咗去婴堂———育英院畀人哋养，而家系生系死我哋都唔清楚。

　　爸爸一去就去咗八年喇，当时一共去咗三百几人，可以返嚟嘅只有十几个，饿死、病死咗好多人。爸爸话，有时瞓醒觉，见到隔篱嗰个都冇咗气喇，最后可以返番屋企真系好难得。所以，我三姐（二排左一）同我大姐嘅年龄相隔咗十年。

　　爸爸其实系一个香港人，抗战胜利之后就返咗香港太古仓船舶进出口码头嗰边做货运理货员，一年返嚟几次。今次由于佢请唔到假返嚟饮大姐嗰餐，所以我哋就决定影张相寄过去畀佢喇。

　　我哋系鹭江村嘅人，当时村口都有一间影相铺，但系我哋都唔去，专程走去艳芳影，觉得嗰度影相系全广州最好嘅。我哋坐14号车去，嗰阵坐车系一站站噉计钱嘅，由鹭江坐到去海珠桥南面桥脚就七分钱，如果再坐过条桥就要毫一纸喇。当时我哋为咗悭四分钱，就提前落车行过海珠桥，经北京路再慢慢行去艳芳———嗰阵五分钱就可以买一个面包嘎喇，好多钱嚟嘎：）

　　1958年嗰阵搞“三面红旗”：总路线、大跃进、人民公社化。因为实行人民公社化，所以食饭、读书都唔使钱。当时我哋嗰边一个大队分为七个自然村：鹭江、康乐、下渡、江贝、客村、康乐西村、桂田。一个村有好几个饭堂，我哋放咗学就可以去食嘎喇，饭任食，食到饱为止。我同七妹（一排左二）影相着嗰件衫就系校服嚟，人民公社发嘎，我哋去街都着校服去嘎。喺60年代，白恤衫、工人裤，好威水嘎喇。不过1960年，国家经济困难，就提出：“新三年，旧三年，缝缝补补又三年。”即系一件衫，起码着三年系新嘅，三年系旧嘅，旧咗之后重要补三年嚟着。

　　我爸爸好“革命”嘎，喺“文革”嗰阵，个个都唔敢返嚟，惊港澳关系嘅身份会畀人批斗。但系我爸爸重坚持返嚟。我知道佢系一个党员，但系到死佢都唔承认。而且我大姐系喺香港出世嘅，当佢想去香港发展嗰阵，我爸爸死都唔畀，重话点辛苦都好，一定要大姐留喺内地建设祖国。

　　爸爸唔喺呢张相入面，真系有啲可惜，不过亦都系因为佢唔喺广州，所以先会影呢张相，呢张缺少咗爸爸嘅“全家福”。

　　口述、相片提供：莫玉华

　　撰文：特约记者 梁小丹