照片提供、撰稿：李麦浪

　　近排喺《南方都市报》嘅“白话广州”版上边睇到咗好多“艳芳”影嘅旧相，同埋旧相后边好多“不老”嘅故事。我受到感染，亦翻出自己屋企嘅旧相———有唔少亦都系喺“艳芳照相馆”入边影口架。

　　记忆中，细个嗰阵，能够去呢家引领广州摄影潮流嘅照相馆影相，系一件好值得期待嘅事嚟口架。因为，“艳芳”坐落喺当时广州最热闹最繁华嘅中山五路，每一次妈妈带我哋去影相，亦都系一家人行街、游玩嘅好机会———儿童公园、中央公园就喺附近，喺“艳芳”影埋相，妈妈就会带我哋去呢啲地方玩。

　　嗰阵时嘅儿童公园入边，好多游乐设施系由石头、砖、石屎、沙等砌成口架，外面只系有一层“磨石米”，有暗红色口架、暗绿色口架，更多嘅系灰色口架。记得我哋好钟意玩嗰啲有小滑梯、跨障碍、小石凳、钻山洞等组合性嘅游乐设施，也钟意玩有两层楼高嘅大滑梯。我哋玩得好兴奋，亦好小心，至惊就系整污糟啲衫嘞。因为我哋去影相，着嘅衫都系新做口架，嗰个年代，能够着新衣系好唔容易口架，我哋点舍得整污糟咗佢呢？我系女仔嚟口架，着住条裙去滑滑梯嘅时候，总系将裙脚撩起嚟再去滑，就惊将条裙仔整坏咗。但系，估唔到嘅系，条裙系保护住嘞，入边嗰条小内裤就经常整坏咗，有阵时甚至乎将小“屁屁”都磨红晒。哈哈，细路仔嚟口架，妈妈梗系冇话我哋嘞，只系肉赤到不得了。

　　睇返“寻找艳芳”嘅旧相，谂返“艳芳”畀我哋童年嘅记忆，再睇返自己用家用相机为自己嘅细路影嘅相，喺回忆过去嘅日子里边，我真系想将呢啲旧相同埋“不老”嘅故事同大家分享嘞。