□肖芳

　　前嗰阵好热下，所以洗净收好啲冷衫，点知呢两日翻风落雨，重好冻。冇办法，又要揾返啲冷衫出嚟着，唔系实冻死收尾。

　　见到我又喺度翻箱倒柜，阿妈笑着讲：“都叫你唔好咁快收好佢嘎啦，重有排冻嘎。”

　　阿妈点解知重有排冻嘅呢，原来系同一啲农谚有关嘅。例如呢句：“三月三，冷死老后生；四月四，冷死老伙记。”就系话三四月份都重会冻啦。“老后生”即系嗰啲未结婚嘅大龄男青年，而“老伙记”就指打工仔啦。试谂下，连呢两种咁做得捱得嘅人都冷死，真系好鬼死冻嘎。

　　噉系唔系五月就可以收好啲厚衫呢？阿妈话都未得，重有句话系噉讲嘅：“未食五月粽，棉衣无入栊；食过五月粽，百日又翻风。”五月初五端午节我哋呢边都兴食粽，到嗰时已经系好热下，个个都着短袖短裤嘎啦，原来重会有冻嘅机会，天气真系多变。

　　真系唔知几时收好啲厚衫先至啱啦。“噉咪过埋五月份啰，以前冇天气预报，啲人都系经过好多年嘅观察同经验积累先得出呢啲咁形象易记嘅农谚，无论系种田定系出远门，都会参考下嘎，你听阿妈话实无错嘅。”