●林德中

　　喺家庭电话、手机普及之前,广州嘅BP机曾经风行一时,好受追捧。BP机推出市场初时,更系一机难求。重记得,为咗佢,嗰日我请咗半日假,嚟到陵园西路嘅电信局,排咗成两粒钟,用1千3百几蚊冇得选择噉买咗一部“大井”BP机、入网。

　　有咗BP机之后,的确系几威嘅。不过随之而来嘅就系烦———皆因嗰时一般家庭都未有电话,BP机一响,就“冇鞋拉只屐”噉仆去传呼站复机。而街头巷尾嘅传呼站通常又要排队。复呢,又等餐死,唔复呢,又怕对方有咩紧要事揾自己。算啦,复啰!点知前边噃位重要煲电话粥!终于轮到自己喇,一揿过去对方话:“走咗喇!”,真系“吹胀”……

　　唔知试过几多次,落班或者出街返嚟,踩到上5楼屋企,啱啱换好衫裤气都未顺返,BP机唔迟唔早就响喇,搞到“裙甩裤甩”；有啲唔熟性嘅人重搞,系唔系都留言:“请留电话。”意思系叫我Call返佢,再等佢复机。大佬啊!我呢家饮紧茶,成间酒楼得一部电话咋,打出都排晒长龙,重讲话“留电话”畀你打入嚟?废话啦!

　　当然,使用BP机有时系可以唔使复机口架———例如通过总台人工转达对方。不过有一次约朋友到“丽都”饮茶,等极都唔见人啫。原来,Call台小姐听错咗———“丽都”变为“帝都”……