□老松

　　前排有套很热门嘅电视剧叫《学警狙击》,里面有个好受欢迎嘅角色laughing哥由谢天华扮演。Fans们抄返佢啲旧史,发现佢喺郑伊健嘅《古惑仔》系列里面亦都做过黑社会角色,叫“大天二”。孙仔问我,点解会有个花名叫“大天二”咁奇怪呢?睇嚟,“大天二”系咩而家啲后生真系唔知啰。

　　“大天二”实情系指旧阵时啲地痞、恶霸。咁点解要叫佢地做“大天二”呢?呢里面有两种讲法。第一种系话,旧时封建时代,普天之下嘅“阿一”就系皇帝。不过喺啲山旮旯地方,好似广东咁,最恶嘅反而系嗰啲作威作福嘅土皇帝。虽然啲恶霸属于无皇管嗰只,但喺又唔敢认比皇帝大,最多只系算天下第二,米畀人起个花名叫“大天二”咯!

　　另一个讲法就要同天九牌扯上关系。天九牌一共三十二只,其中二十二只叫文牌(文子),十只叫武牌(武子)。文牌当中最大嘅系牌面有十二点嘅“天”,不过“天”只能打赢文牌,撞上最细嘅武牌都系输。亦即系话,“天”最多可以虾“文”,但喺就唔可以动“武”。有人借呢个规则嚟讽刺嗰啲净系知道欺负老百姓(民),但又唔敢同官府(武)对抗嘅恶爷,称呼佢地为“大天二”啦!

　　八年抗战时期,喺鹤山沙坪一带就有好多大天二喺度搞搞震。佢地都系当地嘅“地头蛇”纠合起来嘅乌合之众,美其名曰为“游击队”,实质系“游而不击”嘅土匪。保民为名,害民为实。不过呢啲历史就唔喺咁多后生知道咯!