□ 何彤

    挂喺客厅、用咗成七八年、日本产嘅精工牌石英钟坏鬼咗，换上新电池都唔喐得，一时间真系唔习惯。

    忽然间谂起屋企以前用过一只上链嘅旧式闹钟，搬屋嗰阵唔知有冇丢咗？于是去楼下杂物房揾咗一轮，嗰只旧钟重喺度，不过铺咗啲尘，外表重有啲生锈，试下上链，咦，识喐啵。估唔倒，呢只上个世纪七十年代老窦买嘅、由广州钟表厂生产嘅珠江牌上链闹钟重可以派上用场，比起日本仔嗰只石英钟重襟玩。米睇佢其貌不扬，冇乜嘢工业设计、时尚外表，喺未买番新钟之前，重系要靠佢嚟睇时间。虽然比起现时嘅钟佢系老咗啲，不过，嗰种几十年都冇变嘅“心”(上咗链滴哒滴哒咁响)，真是值得再睇下佢。

    上个世纪七十年代，大人有只国产表戴下都算系高级架喇，做细蚊仔，我就试过用圆珠笔喺手腕度画只手表，噉就算有手表戴嘞。搞到畀老母闹，话咁乌遭，洗都有排洗。老母见我咁中意戴手表，于是就买只玩具手表仔畀我戴，氹我啰。到咗读中学，先至用利市钱去街市买只电子手表嚟戴，嗰阵时广州嘅电子手表好平，都是日本出嘅，都几流行口架。后尾，香港嘅亲戚送咗只欧米茄表俾老窦，佢嗰只国产旧表就俾咗我戴，搞到我都唔知几高兴。睹物思人，当年嘅新表都变成咗旧表，唔知老窦喺天堂戴嘅系乜嘢表？