□ 司徒笨

    “原文再续，书接上一回，话说……”一把熟悉嘅声音，一段熟悉嘅开场白，演绎出一个个精彩嘅故事。喺娱乐匮乏嘅七八十年代，有几多广州人无听过小说连播，又有几多人会唔识得楷叔张悦楷呢？可惜斯人已逝，原来楷叔不知不觉间已经离开我哋有十二年噉耐啦！(楷叔于1997年5月24日逝世)

    想当年每日嘅中午12点同下午6点，我都会乖乖噉咘住部收音机听小说连播。当时最中意听楷叔同林兆明讲嘅古仔。林老师嘅作品唔多，最为人知嘅当数《西游记》中猪八戒嗰句“哥哥啊！”而楷叔就有啲唔同，作品多，而且题材广！早期我哋听得最多嘅佢嘅作品，应该系《三国演义》、《杨家将》同《兴唐传》。后嚟武侠小说大热，楷叔又播讲咗《鹿鼎记》、《书剑恩仇录》、《倚天屠龙记》等一批脍炙人口嘅武侠名作。但不论系演义定系武侠，楷叔喺角色设计上都好花心机，令到每个人物角色都有自己嘅特点，使听众闻其声即如见其人。好似《三国》中嘅张飞，低沉且略带沙哑嘅一句“呀呀呸”，几噉带气势啊！又好似《兴唐传》中嘅程咬金，佢嗰几板斧喺楷叔嘅演绎之下就变成咗好有广州话特色嘅顺口溜：“劈你嗰头、督你只眼、斩排骨、啄肉饼、削马蹄。”

    不过踏入上世纪90年代之后，听古仔呢个习惯慢慢畀其他娱乐所取代。到咗而家，除咗老人家同埋每日靠收音机打发时间嘅司机大佬之外，日日咘住听古仔嘅人真系少咗好多。就算系要重温楷叔嘅作品，亦都好难日日去追！好在前几年出咗套讲古嘅C D，包含晒楷叔、林老师等等一班讲古名家嘅作品。虽然价格贵啲，但系可以时不时嚟个一次听得过瘾就值回票价啦！

    不过，怀缅楷叔之余，亦都不得不为讲古呢门艺术走向没落感到可惜。后继无人始终系讲古艺术唔能够继续发展嘅关键，其实谂谂都知，我哋直到而家都宁愿听楷叔十几年前嘅作品，噉即系证明后来者嘅水平去到边度啦！呢种现象长期持续嘅话，讲古艺术又重有咩市场呢！